Minister wey di commandia College schoo dem for Cameroon, wey dem di callam say madam Nalova Lyonga don deny like Pontius Pilate toli say schoo get for continue inside dis April Mon.
De big madam bi deny am dis toli today for inside ngomna toli house.
Dis na taim wey doci don scater for sosha media say schoo pikin dem go turn back for schoo for numba 12 day for dis very Mon.
Ei tok again say, de doci na lie lie doci becoz say no be she stop de schoo taim wey problem for Coronavirus enter contry.
As ei be di tok say make Cameroonians dem no follow dat lie tok, ei explainam say if anything like dat di happen as the fake doci tokam, ie di go na for prime minister Dion Ngute and for President Biya because na dem get de powa for make dat kind tok.
After dis tok, plenty pipo don di check say why and who fit make dat kind doci way get all small small information as way pikin dem for primary and college be get for do practicals and writing for public exams.
Daso some other pipo tok say madam make de bafia dance becoz dem be wan know how way contry pipos go receivam.
Taim way de fake doci be di scater for sosha media, some dem be ask say na prophesy or na black magic way ngomna wan doam make corona clear for contry before de taim as number for corona pipos for Cameroon don go up well well.
Jes now big docta dem and researchers dem neva get de cure for CoronaVirus.
Dem di only use na alakind mukele for domo corona.
By Macwalter Njapteh
